Dear Kuya Chico,

Itago mo nalang ako sa pangalang Nestor. Sa murang edad ko ngayon na 18 years old, masasabi kong mas malawak pa ang aking karanasan sa buhay kumpara sa mga 19 years old. Noong 4 years old ako ay nagtrabaho na ako bilang magbobote para masuportahan ang pagpasok ko sa daycare center, at hanggang ngayon na nasa kolehiyo na ako, sariling kayod parin ako para sa tuition fee ko. Madami na akong napasukang trabaho. Nandyan na ang pagiging karpintero, masahista, kargador, event organizer, at mascot. Pero masasabi kong ang trabaho ko ngayon ang pinaka nagustuhan ko. Isa ako ngayong manghuhula sa Quiapo. Sa umaga ay pumapasok ako sa school at sa gabi naman ay dumideretso na ako sa Quiapo. Masaya ako sa trabaho ko ngayon dahil wala akong boss, hawak ko ang oras ko, at pag ayaw kong pumasok, pwede. Isang cold summer night, tahimik akong nanghuhula sa pwesto ko sa Quiapo nang biglang...

May tumambling papunta sa pwesto ko. Nagpakilala sya bilang si Waldo. Isang matabang lalake na mukang kontra bida pero adorable. Hinihingian nya ako ng tong. Kung ayaw ko daw mawalan ng pwesto sa Quiapo, kailangan ko daw magbigay ng 12 pesos sa bawat customer na magpapahula sa akin. Kwinenta ko ang lahat. Normal na 5 hanggang 7 na customer ang nagpapahula sa akin araw-araw, at sa 12 pesos kada customer, 60 pesos hanggang lagpas 60 pesos ang ibibigay kong tong araw-araw. Halos 21,900 pesos yun sa loob ng isang taon! Dagdag pangkain ko na yun. Pangbili ko na ng bagong uniform yun. At maraming iced green tea latte na din yun. Kaya tumanggi ako kay Waldo. Tumawad ako na baka pwedeng 11 pesos nalang ang ibigay ko per customer na magpapahula. Pero naging mahigpit si Waldo at sinabi nyang hanggang 11.50 pesos lang daw ang tawad. Dahil hindi kami magkasundo ni Waldo, kinapitan nya ang kwelyo ng sando ko at pinitik nya ako sa balikat. Sa susunod daw na magmatigas ako, hindi lang daw yun ang aabutin ko. Nanginginig ako sa takot na tumakbo at iniwan ko na ang cutomer ko nun kahit hindi ko pa sya tapos hulaan. Apat na araw na ang nakalipas mula nung huling punta ko sa Quiapo, at iniisip ko kung papayag nalang ba ako sa hinihinging 11.50 pesos na tong dahil maskit pumitik si Waldo. Hindi ko naman alam kung kanino ako pwedeng humingi ng tulong. Gusto ko sanang magsumbong kay Ben Tulfo kaso hindi ko alam ang number nya. Kung pwede Kuya Chico ay ikaw nalang ang maghanap ng number nya sa google dahil hindi ko talaga makita. Kahit email address lang ni Tufo ok na. Sana ay mapadala mo ang contact number ni Ben Tulfo sa akin bago umalis yung customer na iniwan ko sa Quiapo para matapos ko na ang panghuhula sakanya at makuha ko ang bayad nya.

Lubos na gumagalang,
Nestor