Dear Kuya Chico,

Itago mo nalang ako sa pangalang Annie. Isa akong part-time masahista sa isang "adult massage parlor", pero tuwing umaga ay sa bakery ako nagtatrabaho bilang part-time panadera. Ako ang panganay sa amin kaya kailangan kong magtrabaho para mapag-aral ang bunso namin. Ako din ang bunso dahil wala naman akong kapatid, kaya pagkatapos kong magtrabaho sa bakery ay dumideretso na ako sa school. Sa edad na 17 years old, mahirap para sa akin na pagsabayin ang pagtatrabaho at pag-aaral. Buti nalang hindi ako 17 years old. Ako ay 21 years old at graduating student sa kursong Accounting. Minsan ay iniisip kong itigil nalang ang isa sa part-time na trabaho ko dahil pareho naman silang tig-apat na oras, pareho din naman ang sweldo, at pareho naman ang ginagawa ko at ang pinagkaiba lang ay, sa bakery, tinapay ang minamasahe ko at hindi humihingi ng "extra service" ang tinapay.

Nung nakaraang buwan ay titigil na sana ako sa pagmamasahe, kaya lang may nakilala akong customer na gwapo at mabait at gusto daw nya na ako lagi ang magmasahe sakanya. Dahil gusto kong lumalim ang pagkakakilanlan sakanya hindi muna ako nag-quit. Yung trabaho ko nalang sana sa bakery ang ititigil ko pero may nakilala din akong customer na gwapo din at mabait. Nagustuhan nya ang luto kong tinapay "Miss, ang sarap ng monay mo." ang sabi nya. Kaya lang pagkatapos nya sa monay ko, gutom parin sya, kaya bumili sya ng isang putok. Nabitin daw sya sa isang putok kaso wala na syang pera, kaya habang walang nakatingin ay pinagbigyan ko pa sya ng isang libreng putok.

Naguguluhan ako ngayon Kuya Chico kung ano ang iiwanan ko na trabaho. Si Danny nga pala yung gwapo at mabait na customer na minamasahe ko, at yung gwapo at mabait na customer ko sa bakery ay si Danny din. Ang iniisip ko lang, kapag nag-quit ako sa bakery, hindi ko na mabibigyan ng libreng putok si Danny, pero kung sa pagmamasahe naman ako mag-quit, lagi nang libre ang mga putok ni Danny. Sana ay mapayuhan mo ako Kuya Chico.

Lubos na gumagalang,
Annie