Dear Kuya Chico,

Itago mo nalang ako sa pangalang, Raymund. Ako ay 21 years old at isang estudyante. Isa ako sa mga kinatatakutan ng mga tao sa school namin. Astig kasi ako. Walang nakikipag-away sakin kahit kelan, at kung may magkamali mang makipag-away sakin, hindi ko isusumbong sa teacher. Ganun ako kaastig. Napilitan akong maging matibay at matapang dahil lumaki ako in the hood. I'm gangster! Pero wala akong gang. Pero I'm gangster. Wala akong kaibigan sa school, pero meron akong mga kasangga sa may amin. Si Bobby at si Babi. Si Bobby ay 12 years old at si Babi ay 14. Madalas kaming magkakasama at nanggugulo. Walang bumabangga sa amin at kami ang may hawak sa buong compound sa loob ng gate namin. Aminado ako na madami akong kalokohan. Siguro ay kulang lang ako sa aruga dahil lumaki akong walang tito. Nagpapasalamat nalang ako sa Diyos dahil minahal ako ng mga magulang ko na parang tunay nilang pamangkin.


Isang araw, habang nagpapaligo ako ng aso. Bumukas ang gate ng compound namin at may pumasok na kotche. Hindi pamilyar ang kotche at hindi ko kilala ang nagmamaneho. Dali-dali kong tinawag si Bobby at Babi at sinabing talasan nila ang mata nila dahil may mga dayo. Naisip namin na bantayan ang mga dayo. Gumawa kami ng plano na sasalakay kami kapag tulog na sila. Pinag-isipan namin ang magiging bawat galaw namin. Gumawa kami ng drawing para alam namin kung saan ang mga entry points namin sa pag-atake. At napagplanuhan namin na susugod kami pagpatak ng alas-dose ng gabi. Kaya lang nung natapos namin ang plano 6pm na pala at kailangan nang umuwi ni Babi dahil magrorosary pa daw sila. At umuwi na din si Bobby, hindi ko alam kung baket.

Naiwan akong mag-isa na nagbabantay Kuya Chico. Matagal kong binantayan ang bahay na pinasukan ng mga dayo. Halos 26 minutes na akong nagmasid nang biglang lumabas ang tatay ko. Sinabi ko sakanya ang plano ko pero pinagtawanan lang nya ako. Sinabi nya na mga bagong lipat daw ang mga sinasabi kong dayo. Kaya pala nawala yung "for sale" na nakadikit sa garahe. Papasok na sana ako sa bahay nang biglang...

Naalala ko na nagpapaligo nga pala ako ng aso! Hindi ko pa sya binabanlawan at tumigas na ang shampoo. Pabukas na ako ng gripo nang masilayan ko ang isang sobrang sexy na babae sa may pinto ng mga bagong lipat. Naglakad sya palapit sakin at sinabing "Ang tigas na ah!" Nagulat ako dahil hindi ko alam kung pano nya nalaman. Tinanong ko kung pano nya nalaman na matigas na? At sinabi nyang dahil halos hindi na daw makagalaw yung aso ko. Yung shampoo pala ang sinasabi nyang matigas na. Nagpakilala sya bilang si Fran at nagkwentuhan kami. Binanlawan ko ang aso ko at wala naman masamang nangyari sakanya. Mejo tumutubo na nga ulit ang mga balahibo nito. Napadalas ang kwentuhan namin ni Fran at may mga pagkakataon na gusto ko syang tanungin kung pwede ba akong manligaw. Isang bagay lang ang pumipigil sakin Kuya Chico, naiilang ako sa bigote ni Fran. Maputi pa naman sya kaya kitang-kita ang bigote nya. Pero naisip ko na hindi dapat maging hadlang yun. Inaya kong magmotel si Fran at natuwa ako dahil pumayag sya. Pero naguguluhan parin ako kung ano ang gagawin ko pag dating sa motel. Sasabihin ko ba kay Fran na mag-ahit sya ng bigote? O ahitin ko nalang kapag tulog na sya? Sana ay mapayuhan mo ako within this week.

Lubos na gumagalang,
Raymund